A o faamanatu ai le Aso Faapitoa o le Aso mo tina i lona aso malolo, na faatamaia ai le maota a se tasi o fai ofu iloga i le atunuu ma atunuu mamao le susuga ia Afa Ah Loo i le afioaga o Lotopa.
O lenei maota e pei ona ta’ua e Ah Loo o lo latou malu lea sa fofoaina mai ai lona lumanai.
“Ua atoa nei le 24 tausaga talu ona fausia le fale o nai o’u matua o Amioga & Samuelu Folasā ae le’i faatamaia i le afi.
“O se tasi o le matou lava aiga na tuuina iai le faatuatuaga e vaaia le fale a o malaga atu foi le tina o le aiga o loo nofo ma tausia le matou aiga, ua ala ai ona faatama’ia le fale o nai o’u mātua.
“Peitai sa galo ia te ia ona tapē le ogaumu kesi sa faavevelaina ai lana mea’ai ae le’i tuumuli atu i Piula, o le mafuaaga lena ua faatama’ia ai le fale o nai o’u mātua.”
O le maota ua faatama’ia ma le fanua na saunoa Ah Loo o se meaalofa na foaiina e se tasi o tamalii sa iai i upufai a le Malo le Afioga ia Joe Keil lea ua lagomau i tiasa.
“O lenei fale ma le fanua, o se meaalofa na tuuina mai e le afioga ia Joe Keil, o lē ua fai i lagi le folauga, i o’u mātua talu ai le la tautua matavela ia Joe Keil ma lona aiga i le mau tausaga ua tea.
“Na masani mai le afioga ia Joe Keil mai nai o’u mātua i le taimi a o avea ai Joe Keil ma se misionare mo le Ekalesia a Iesu Keriso o Aso e Gata Ai i le afioaga o Falealupo, Savai’i.”
“O nai o’u matua sa faatea ma le nuu o Falelima ma le aiga o lo’u tamā, talu ai le la filifiliga e papatisoina laua i le lotu Mamona.
“I lena vaitaimi, sa faifeau le tamā o lo’u tamā, le fetalaiga ia Folasā Samoa Folasā i le Ekalesia Metotisi.
“E oo lava i le taimi ua maliliu ai nai o’u mātua, e lei faaa’eina e le matou aiga i Falelima.”
O lenei la maota e faaigoaina e Ah Loo o se molimau ma se faamanuiaga i le tele o puapuagatia na feagai ai ma nai o’u tuaa, aemaise ai le la tautua i le afioga ia Joe Keil ma lona aiga.
“E tele lava ni mea lelei ou te manatuaina ai lenei fale, sa avea ma se nofoaga mautu mo o’u mātua.
“O loo lagomau nei o’u mātua i luma o lenei lava fale ma ou te faafetaia lava ona e lei aafia pe faatama’ia le mea o loo taooto ai nei o’u mātua i le afi.”
O nisi o meatotino i lenei maota e aofia ai ma se laau su’isu’i a le tina o Ah Loo na amata ona a’oa’o ai lana taleni su’isu’i.
O aiga faapea uo mamae ma i latou sa faatino ai le auaunaga fai ofu o loo latou taimua i le faasalalauina lea o se auala i luga o upega tafailagi https://gofund.me/97b99f86 e fesoasoani ai le toe fausia lea o le maota o Ah Loo.
“O le taimi nei, atonu o le fuafuaga lena, e faigata lava i lenei taimi ona o le taugata o le tau o le soifuaga ae iai lava le faamoemoe o le a mafai ona toe fausia se isi fale i luga o le faavae na fausia ai le fale o nai o’u mātua.”
