Ua tuua’ia le kamupani vaalele a le Ea Niu Sila o lea na te faataugataina tau o pasese mo tagata feoa’i i le va o Niu Sila ma Ausetalia.
Ua mata’itū e le Consumer NZ faigamalaga i le va o atunuu e lua i totonu o le 18 vaiaso ina ia iloa ai le tau o pasese i taimi o tuuaga o aoga.
Na iloa ai e oo atu i le 167% lea na taugata atu ai pasese i taimi o tuuaga o aoga na i lo le tolu vaiaso a o le’i faia tuuaga o aoga.
Na faatusatusa ai foi e le Consumer NZ aga’i i tau o pasese a le kamupani vaalele a le Qantas i totonu lava o le piriota lava lea e tasi, ma o i na iloa ai o taimi o tuuaga lea na matuai iloga ona taugata ai le tau o pasese.
I le va o le Ea Niu Sila ma le Qantas, e 43% e maualuga ai tau o pasese a le Ea Niu Sila faatusa i le Qantas e 26%.
Molimau a le pule sili o le Consumer NZ, Jon Duffy i tala a le leitio faavaomalo a Niu Sila, o le tali masani a le Ea Niu Sila lea e faaaogā le pricing model e na te fetuuna’ia le tau o pasese, peitai o se model e lē o talitonuina e le Consumer NZ ma ia faatalosagaina ai le tatau ona su’esu’e.
O le fesili a le Consumer NZ, aisea la o loo mafai ai ona taofiofi e le Qantas ana ia pasese i se tau maualalo tusa lava poo taimi o tuuaga o aoga?
Puna o Faamatalaga: Consumer NZ calls for inquiry into Air NZ New Zealand pricing model | RNZ News
