O loo tālia le taunuuga o se suesuega faafoma’i e faamautu ai le mafuaaga tonu o le maliu o se tagata faigaluega faavaitaimi mai Samoa i le kamupani o le Golden Bay Fruit i Niu Sila i le silia ai nei ma le lua vaiaso.
Ua faailoa mai e se molimau faatuatuaina o lē ua maliu o se tama tane mai le afioaga o Solosolo na iloa ua maliu a o tofa o ia. Faaalia e le molimau e lei leva ona toe malaga lea tagata mo ia galuega, ae ua faafā ona maua lona avanoa e malaga ai.
O ia o se tasi ua lava lona silafia i ia galuega ma o se lagolago malosi foi i lona aiga i le itu tau tupe maua, e pei o le autu o le polokalame o galuega faavaitaimi.
I le faalauiloaina o le maliu o lea tagata faigaluega i auala o fesootaiga a le sooupu o galuega nei i Niu Sila, ua fautuaina ai le au galulue ia faamuamua lo latou saogalemu ma le soifua maloloina.
O le masina nei foi na molimoli mai ai i lona aiga i Savaii se isi tagata faigaluega faavaitaimi mai lo tatou atunuu sa galue i Ausetalia, na maua atu ua maliu a o tofa.
