Ua faatali le Minisita o Fesoota’iga ma Faamatalaga faatekonolosi, i le lipoti i se sailiiliga poo se forensic report, e iloa ai le tulaga tonu o loo taoto ai le faagaioia o se alāata tau televise e pulea ma faagaioia e le Malo.
O se talanoaga faasamasamanoa ma le Minisita le afioga Toelupe Poumulinuku Onesemo, i le Aso Gafua na ia faailoa ai lea sailiiliga ma ia faailoa ai e tāua tele le maua o faamatalaga uma a o le’i faamautu se finagalo o le Kapeneta, i le faatinoina o lea tautua tau faasalalauga poo se auaunaga tau fesoota’iga i luga o televise.
Ua faailoa e le Minisita o fesoota’iga ma faamatalaga faatekonolosi lea fuafuaga, i le savalia ai nei o le tolu vaiaso e lē o toe ola le alāata tau televise a le Malo o loo maua ai faasalalauga o fonotaga a le Palemene, ina ua lipotia ai le titina e le kamupani o loo pulea fesoota’iga digital o loo faaaogā e faletelevise, lea alāata ona talu ona amata faasalalauga a le alāata tau televise a le Malo mai le taimi o le faigamalo sa iai, e le’i totogiina se tupe i le kamupani digital ma sa faaaogā fua e leai se totogi.
O le toe faatūina o se alāata tau televise a le Malo o se fuafuaga mai le faigamalo sa iai, ae mo le silafia o le faatūina o le uluai faletelevise i Samoa sa pulea e le Malo ma sa faagaioia faapisinisi, na alu alu faamuta ae faatau e se kamupani tuma’oti i totonu o le atunuu. Na mafua ona faia lea faai’uga ona ua tele tupe na faagaioia ai, ae faaletonu tupe maua.
