Ua faamaonia i se faai’uga a le Faamasinoga Faaitumalo a le atunu’u, le moliaga e tasi o Hugo Afaese Fata o lona umia o se meafaitino ma le faamoemoe e fa’aaoga i fuala’au faasāina. O le faasalaga o lea moliaga pe a faamaonia e fitu tausaga i le falepuipui poo se sala tupe e lē silia ma le $20,000 tālā poo fa’asalaga uma ia e lua.
O se osofa’iga a leoleo i se nofoaga i Matautu i Apia ia Tesema o le tausaga e 2024 na maua ai se fua poo se scale mani taga pepa ‘i’ila lāiti poo zip lock plastic bags.
O le fua sa ave e leoleo mo su’esu’ega a le nofoaga o su’esu’ega faasaienisi ma faamaonia ai, o lea meafaitino sa maua ai ni vaaiga o le pauta faasāina o le ‘aisa. Sa tete’e Hugo ina ua molia e leoleo, ae o le mae’a ona su’esu’eina mau a leoleo na tu’uina atu faapea ma mau a lē ua molia, na taunuu ai le faai’uga a le afioga i le faamasino o le Faamasinoga Faaitumalo le afioga, Leota Raymond Schuster i le faamaonia o le moliaga, ma ua tolopō ai mo le lauina o se faasalaga.
O lē ua molia o se tasi e lauiloa i le taaloga o le faipele poo le fusu ma sa manumalo i ni pine e aofia ai le pine auro i nisi o ta’aloga a le Pasefika sa tausiniō ai i ‘au masii a Samoa.
Comments
Loading comments…