Ua tālia nei se faaiuga a le faamasinoga sili i le mae’a tuuina atu o finauga faaiu a loia sa auai i taualumaga o suesuega i le talosaga a le faletua o le sa avea ma faamasino sili, faasaga i le uili a lona toalua faaipoipo le afioga Patu Tiavaasu’e Falefatu Maka Sapolu.
O le tuanai ona suesueina o mau a itu auai o lenei mataupu na tolopo ai mo tapenaga o folasaga mulimuli a loia mo le Ofisa Tausi Mavaega, o le loia a se tasi o le aiga o lē e ana le uili o ia o se isi e maua ni faamanuiaga mai le vaevaega o meatotino a lē sa avea ma faamasino sili, faapea ma le loia a le itu tagi le faletua o Iliganoa Daphne Sapolu.
O le faaiuga o le vaiaso na tea nei na folasia ai ia finauga faaiu. O le mau a le itu tagi o loo autu iai lana finauga o le iai o se gaioiga faaalatua ua tuuaia i le faia faamalosi o le saini a lē e ana le uili, ae na te lei sainia.
