Ua savalia nei le 3 tausaga talu ona taatia i luma o le Kapeneta le manaoga o lana afioga i le Faamasino Sili ina ia faamatuu atu i le faamasinoga le faatinoga o lana tala o le tupe.
O le talitonuga o lana afioga i le Faamasino Sili o Satiu Simativa Perese o lea faiga ina ia avea o se auala e mausali ma mauaa ai le tutoatasi o le Faamasinoga o se tasi o vaega tāua o le tafatolu fefaatauagai o le malo o Samoa.
Na faaalia e le Faamasino Sili o loo faaauau lava soalaupulega i lea mataupu tāua, ma e lē o se mataupu faigofie ona o faiga lava na sau ai, e faatonutonufolau mai e le malo le paketi a le Faamasinoga.
Peitai o le talitonuga o le Faamasino Sili afai e tutoatasi le faamasinoga e lē tatau la ona pulea e le isi vaega o le tafatolu o fefaatauagai le isi vaega.
Sa faaalia le finagalo o le Tamaitai Palemia, Fiame Naomi Mata’afa i sana feiloaiga ma ofisa faasalalau le tagatagai ai e lē gata i le faamasinoga ae faapea foi le Ofisa o le Fono Aoao faitulafono a Samoa.
Sa ioeina e le Tamaitai Palemia le tāua o le tutoatasi o le lala o le Faamasinoga mai i le Palemene ma le Malo ma e tatau foi ona iai lava le latou paketi e faatino ai lava a latou fuafuaga.
