Ua mae’a nei ona fofogaina mau i le toe iloiloina e le Faamasinoga Maualuga o le faai’uga a le Faamasinoga Faaitumalo na lē mafai ai ona tatala i tua Samuelu Su’a lea sa amata ona nofo taofia ma lona toalua o Sivai i le vaaiga a leoleo i le masina o Ianuari o le tausaga nei, peitai na tatala i tua lona toalua ae faaauau pea ona taofia Samuelu e oo mai i le taimi nei.

O taualumaga a le faamasinoga i le Aso Lua o le vaiaso nei, na toe valaau ai molimau a leoleo e pei o se tasi o leoleo sinia.

Na tulai ai foi Samuelu ma lona tuafafine e faia ni molimau e tau faamalamalama ai le mafuaaga o igoa ma faai’u eseese o Samuelu, aemaise e lua ona pepafanau sa tuuina atu e leoleo mo iloiloga a le Faamasinoga Maualuga.

O moliaga o Samuelu o lona toalua ma nisi e toatolu e aofia ai le faipule o Salega tasi, ua lē taunuu ona valaau molimau i le aso 22 o le masina nei e pei ona sa faatulaga ai i se faai’uga a le Faamasinoga Faaitumalo.

O lea ua toe tolo atu ia Me o le tausaga fou ina ua talia e le Faamasinoga Maualuga le talosaga apili na toe lu’i ai le faai’uga e faia i le masina nei lea faamasinoga.

O le tatala i tua i ni aiaiga o Samuelu pe faaauau pea ona nofo taofia seia oo ia Me o le tausaga fou e faia ai le faamasinoga, o le a aumai iai se faai’uga a le faamasino sinia o le Faamasinoga Maualuga i le vaiaso asau.