O loo nenefu ma taligā pisinisi e aafia mai osofa’iga a gaoi e faaaogā ai taavale e soso’a ai faleoloa, i le fesoasoani a le malo na faailoa mai ia Me.
O le masina o Me na fofoga mai ai e lē sa avea ma minisita o leoleo i lea vaitaimi, Poto Williams le $6 miliona o le crime prevention fund e fesoasoani ai i ē e ana pisinisi ua aafia.
Peitai i lipoti a le Newshub e oo mai ananafi, e na o le lima pisinisi i Aukilani ua oo iai le fesoasoani ae o le isi uma lautele e le’i toe faalogo i se isi tala.
O Aukilani ma Waikato lea e tigaina i le faatupula’ia o pisinisi nei e gaoia ma faaleaga e faaaogā ai taavale, ma e lē o faigofie i le to’atele tupe alu e toe faaleleia ai faleoloa atoa ai ma le alu i luga o inisiua e tatau ona totogi.
E iai nisi o pisinisi e oo atu lava i le masina o tapuni pe sili atu foi ona e lē gata i galuega faaleleia, ae o le tele o isi su’esu’ega e tatau ona faia ma gau ai lava ma pisinisi.
Saunoa le minisita o leoleo ua iai nei Chris Hipkins, o lea o loo galulue ma le isi 15 i le 20 faleoloa ma poo le isi 10 vaiaso o i luma ua maua fesoasoani mo i latou.
Ua manino mai ai foi e lē mafai e le faleoloa ona faatalosaga sa’o mo nei fesoasoani tupe, peitai o loo tauala atu i leoleo.
