O le ioeina ai e se taulealea matua o le moliaga o le fasioti tagata faamoemoeina i luma o le Faamasinoga Maualuga i le vaiaso nei, ua nofo taofia ai nei e faatali le iloiloina o le talosaga a loia a leoleo ua finau ai e tuuina atu le 17 tausaga e nofosala ai i le falepuipui lea taulealea o lona suafa o Kiuma Talouli o Salelavalu i Savaii.
Sa tetee o ia i le moliaga a leoleo ae na suia lana tali i le ioe ina ua tula’i mo le valaauina o molimau a leoleo i le Aso Lua o le vaiaso nei.
O Aokuso o le tausaga na te’a nei i Salelavalu na tula’i mai ai le solitulafono ua ioeina e lē ua molia, e pei ona faailoa e leoleo sa umia e Kiuma se laaumalosi sa ia faaoo ai le maliu i le tamaitiiti e 12 tausaga le matua.
Na faatino le gaioiga e lē ua molia a o moe lē ua maliu i le ta’inamu.
O le faasalaga maualuga o le solitulafono o le faaoo o le maliu pe a ioe lē e molia ma faamaonia e le faamasinoga o le soloatoa i le falepuipui, ae o aiaiga masani o lea faasalaga o le mafai lea ona talosaga e magalo i le palola pe a mae’a tuli le 10 tausaga o lea faasalaga.
Peita’i e 17 tausaga o loo talosagaina e loia a leoleo e tatau ona tuli ona faato’ā agavaa ai lea i se iloiloga a le komiti o le palola.
