O lea ua avanoa nei le nofoa o le itumalo o le Vaimauga Numera 3 i le paeaiga lona 17 a le Palemene, ina ua tuumalo faafuasei le afioga Tapunuu Papalii Niko Lee Hang, o se sui faipule o le faafaletui o le pati faaupufai e puipuia aiātatau a tagata ma sa ia tauaveina le nofoa mai le amataga o le paeaiga.
Ua lima paeaiga faapalemene o avea pea Tapunuu poo le susuga Papalii Niko Lee Hang ma sui usufono o le fono aoao faitulafono, lea sa uluai pale i le tofi i le tausaga e 2001 i le taunuuga o se faigapalota laititi i lea tausaga ma avea ai o se tasi o faipule mo nofoa o le aupalota taitoatasi.
O le tuanai o le palota tele i le tausaga e 2006 na filifilia ai i le tofiga Minisita o Tupe, ae na faatoa toe tofia i le Kapeneta i le paeaiga faapalemene lona 16 mai le tausaga e 2016 i le 2021 lea sa avea ai ma Minisita o Galuega Tetele a le Malo.
O le toe vaevaeina o itumalo faapalota na tauva ai i le palota tele o le 2021 i le nofoa o Vaimauga Numera 3 i lona suafa matai o le Tapunuu mai le afioaga o Tanugamanono i le tuanai o le paeaiga lona 15 a le Palemene sa tulai ai i le tofi faipule o le itumalo tu taulaga o le Vaimauga.
O le amataga o le vaiaso nei na toe taliu mai ai le afioga i le sui faipule mai sana siaki faafomai i Niu Sila ae tuumalo i le Aso Lua o le vaiaso nei.
Le taitai o le Itu agai ma le vaega e puipuia aiātatau a tagata susuga Tuilaepa L Sailele Malielegaoi, i sona finagalo faamaise i le faletua ma le nofo a alo aemaise le tuumalo o le afioga Tapunuu Papalii Niko Lee Hang o se tasi o sui lagolago o le faafaletui o faipule o lana pati faaupufai e puipuia aiātatau a tagata.
E lei mautu se aso e faia ai ona toe sauniga faalemalo, ae tuumalo o ia ua 68 tausaga o lona soifua.
