O loo faagasolo pea suesuega a leoleo i le toesea i se gaioiga solitulafono se tinoitupe e $80,000 tala mai le faletupe o le ANZ i Apia, ae o le sa avea ma faauluuluga o se auaunaga a lea faletupe, o Seira Malifa ua tolo atu i le faaiuga o Ianuari o le tausaga fou sana tali i le moliaga e tasi o le lima tagoese a o avea ma tagata faigaluega ona o le toesea o lea tupe tele.
O le amataga o lenei vaiaso na toe valaau ai le moliaga o lē ua tuuaia ma faamautu ai e loia a leoleo e tasi lava le moliaga o Seira.
Ua mafua ona toe taatia atu i le faaiuga o le masina amata o le tausaga fou le faia o sana tali i le moliaga, ona o loo manaomia e lana molia se taimi e silasila ai i le moliaga a leoleo.
O loo tatala i tua lē ua tuuaia i ni aiaiga e faatali ai taualumaga a le faamasinoga maualuga i lona moliaga.
O faamaumauga a leoleo ua faailoa ai o le toesea o le 80 afe na faatino ai se gaioiga e lē ua molia o le faia o ni talosaga mo le maua o ni nonogatupe, ona ia saini lea ma faamaonia i lona tulaga o ia o le pule o lea auaunaga a le faletupe, mulimuli ane ona ia toe tala lea o ia nonogatupe.
Ua faailoa e se molimau e talitonuina o suesuega o loo faagasolo pea e ono molia ai nisi tagata faigaluega o le faletupe o le ANZ ma faaopoopo ai i se isi fuainumera maualuga seleni ua aafia i lea gaioiga.
