Ua faatali nei le sui faipule o le itumalo palota o Siumu ma le sui faipule o le itumalo palota o Faleata 4, i se tali atu a le taitai o le pati faaupufai e puipuia aiātatau a tagata ia la faamavaega tusitusia na faaoo i le ofisa tutotonu o le vaega faaupufai i Sogi, i le Aso Tofi o le vaiaso nei le aso 3 o Novema.
O kopi o faamavaega tusitusia a le tofa Ale Vena ma le tofa Tuu’u Anasii Leota, e mafuli o la lagona i mafuaaga o le lē tuuaulafo o le susuga Tuilaepa L Sailele Malielegaoi, i se tuualalo ua tatau ona toe filifilia se isi taitai ae faasee tuagalu ma le taitaiga o le vaega faaupufai.
Ua faailoa foi e ia sui faipule o le a avea i laua ma faipule tutotasi ae le lagolago atu i se isi pati faaupufai e pei o le Faatuatua i le Atua Samoa ua Tasi, ua avea nei ma faigamalo fou i le tuanai o tausaga e tele o tauave e le vaega e puipuia aiātatau a tagata le pulega o le Malo.
Se vaega o fesili ma tali e ala i finagalo o sui faipule ua faamavae ma le vaega e puipuia aiātatau a tagata i le feiloaiga ma tusitala i le Aso Tofi.
I le mae’a o le palota tele ia Aperila o le tausaga na tea nei, o palota laiti ia Novema o le tausaga lava ua tuanai, le palota laititi a Gagaifomauga Numera 2 i le masina o Iuni o le tausaga nei, ma faaiuga a le faamasinoga maualuga i le nofoa faaopoopo o tamaitai lea na filifilia mai ai faipule tamaitai e toatolu, e 22 nofoa sa umia e le Itu agai mai lena taimi, ae o lea ua faamavae sui faipule e toalua ua mananao e avea ma sui tutoatasi ma ua totoe ai nei le 20 o sui faipule o le Itu agai ma le vaega e puipuia aiātatau a tagata.
O le itu a le faigamalo le vaega faaupufai o le Faatuatua i le Atua Samoa ua Tasi o loo umia nofoa e 32 mai le aofaiga e 54 o nofoa o le paeaiga lona 17 a le Palemene.
