O loo i Niu Sila i se valaaulia a le Komesina o Leoleo a lea Malo tuaoi, le Komesina o leoleo o Samoa le susuga Auapaau Logoitino Filipo, ma le sui Komesina susuga Papalii Monalisa Tia’i Keti, ma ni sui se toalua o le Matagaluega o leoleo, falepuipui ma le ola toe fuataina.
O lea faigamalaga e tele ni mataupu tāua i le faaleleia o le auaunaga a leoleo i Samoa o loo soalaupule ai, ma le Komesina o leoleo o Niu Sila le susuga Andrew Coster.
Ua faailoa e le Matagaluega o leoleo i Samoa i ana auala o fesootaiga o le a asiasi i le Kolisi faaleoleo a Niu Sila le Komesina mai Samoa ma lana aumalaga, e mataitu vaega tāua i le aoaoina o leoleo, ma ua faaalia o le tasi lea o vaega o le a lagolago ai leoleo a lea Malo mo le aoaoina o Malu o le Malo i lo tatou atunuu, aemaise o lea ua amata galuega o le kolisi faaleoleo o loo fausia i Tafaigata i se vaega o le fanua o le Malo o Samoa sa iai le falepuipui tuai ua tapunia.
O le tasi o vaega tāua i feiloaiga ma talanoaga a Komesina o leoleo o Malo e lua o le itu i le lagolago a Niu Sila i le tulaga i le puipuiga, ma o se isi lea o avanoa o le a faasoa atu ai le Komesina le susuga Auapaau Logoitino Filipo, i se fesoasoani a leoleo o Niu Sila i tapenaga o le itu i le puipuiga i le taimi o le taligamalo a Samoa i le fono a taitai o Malo o le Taupulega o le a usuia i Apia i le tausaga e 2024.
