O lu’itau tetele o loo feagai nei ma atunu’u lāiti e aofia ai Samoa o loo fa’atalanoa i le fono masani fa’aletausaga a le fa’alapotopotoga o tupe a le lalolagi le International Monetary Fund poo le I.M.F ma le faletupe o le lalolagi.

O loo auai le usugafono a Samoa o loo ta’ita’ia e le Sui Palemia ma le Minisita o Tupe le afioga, Mulipola Anarosa Ale Molio’o, fa’atasi ai ma nisi o ofisa sinia o le malo e aofia ai le Ofisa Sili o le Pulega o le Matagaluega o Tupe a le malo, o le Sui Kovana o le Faletupe Tutotonu, Ofisa Sili o le Matagaluega o Faalapotopotoga tuma’oti uma a le malo, Ofisa Sili o le Ofisa o Numera Fa’amaumauina, le Samoa Bureau of Statistics, ma ofisa sinia o le Matagaluega o Tupe ma le Faletupe Tutotonu o Samoa.

O se tasi lea o fonotaga e tāua mo Samoa o se sui o ia auaunaga tau tupe faavaomalo e pei ona fa’ailoa i se faasalalauga mai le Matagaluega o Tupe a le malo o Samoa. E tāua ona o loo soālaupule ai faiga fa’avae tau tupe a le lalolagi ma talanoaina ai le tulaga galulue fa’atasi o atunuu ma fefaasoaa’i auala ma faiga e tali atu ai i lu’itau o tamao’aiga o atunuu ta’itasi.

O le faletupe lava ia o le lalolagi e fitu ni atina’e tetele o loo fesoasoani ai mo Samoa ma o loo autū ia atina’e i le auaunaga fa’asoifua mālōlōina, galuega tetele ma fela’ua’iga, o fa’amatalaga ma auaunaga fa’atekonolosi, siosiomaga ma le vaega o tupe.

O le tau o ia atina’e o loo fesoasoani mai ai lea faletupe e 211 tesimale 4 miliona tālā tupe Amerika.

O le IMF o se fa’alapotopotoga tau tupe a le lalolagi na avea ai Samoa ma ona sui auai i le masina o Tesema o le tausaga e 1971 ma e 191 atunuu o loo iai i totonu.

O lana pitola’au tauave o le mata’itū lelei o le fa’aaogaina o tupe i atina’e ‘ese’ese. O le vaiaso nei o loo faagasolo ai lea fono o loo auai Minisita o Tupe o isi foi atunu’u o le lalolagi lea o loo usuia i le atunu’u o Thailand ma o le faai’uga o le vaiaso nei e mae’a ai.