O lea mataupu o loo finauina ai le nofoa o le sui a faipule a Sagaga 1 le tofa Loau Solamalemalo Keneti Sio i le faamasinoga i se talosaga a le Fofoga Fetalai o le Palemene, Susuga Papalii Li’o Ta’eu Masepa’u e faailoa ai le avanoa o le nofoa o loo nofoia e le sui a faipule o le Itu Agai.
O lea mataupu e afua mai i le aso 30 o Aokuso 2023 ina ua molia e le Fofoga Fetalai le sui faipule i lona lē auai i Fonotaga a le Palemene mo aso e 7 e aunoa ma se faatagaga mai le Fofoga o le fono.
O aso e lei auai ai le sui faipule e aofia ai le aso 22 – 23 o Iuni 2023, 26 – 30 o le masina lava lea.
Na faailoa e le sui faipule mafuaaga o lona lē auai atu ona sa gasegase ma sa ia tuuina atu foi lana pepa ma’i mai le fomai, peitai na teena e le Fofoga Fetalai.
O le talitonuga o le Fofoga Fetalai o aso o loo ta’ua i le pepa ma’i o aso ia sa malaga ai le sui faipule i Amerika Samoa.
O loo teena e Loau moliaga uma, ma o le mafuaaga lea ua faasee atu ai le mataupu i le Faamasinoga mo se faaiuga e tusa ai ma le Mataupu 47 o le Faavae o Samoa.
