O sui e to’alima o loo totoe o le Bali Nine poo i latou e to’aiva na faimalaga i Bali ma taumafai e aumai faananā ai le 8.3 kilo o fualaau faasāina mai Bali i Ausetalia i le 2005, ua toe tuvae uma mai i Ausetalia i le taimi nei i le mae’a o se taimi umi na falepuipui ai i Indonesia.

Sa avea o se tasi o mataupu na tulituliloa e le to’atele le mataupu lenei i le taimi na tupu ai i le 2005 na faamaonia ai moliaga o alii e to’alua sa ta’ita’ia le vaega e to’aiva lea, o Andrew Chan ma Myuran Sukumaran lea na faaoo iai le faasalaga oti i le 2015.

O le isi o Tan Duc Nguyen na maliu i le falepuipui ona o le kanesa ma le tamaitai e to’atasi o Renae Lawrence na faasa’oloto ma toe faafoi mai i Ausetalia i le 2018 ae totoe ai le to’alima o alii uma lea sa tuli faasalaga i le falepuipui, e soloatoa ma lē agavaa i le palola, peitai o se maliega na faia ma le Peresetene fou o iai nei o Indonesia o Prabowo Subianto ua mafua ai ona faasa’olotoina uma le to’alima lea o Matthew Norman, Martin Stephens, Scott Rush, Michael Czugaj ma Si Yi Chen i le mae’a o le 19 tausaga i le falepuipui.

I sa latou pepa o faamatalaga ua faamatuu mai i le aufaasalalau ua ta’ua ai lo latou fiafia ma maua se mapusaga ina ua toe tuvae mai i Ausetalia.

Ua faailoa foi le fiafia o le Palemia o Ausetalia, Albanese i le tulaga ua iai le maliega i lea mataupu ma faafetaia ai le agaalofa o le Peresetene o Indonesia ua iai nei aemaise minisita o le va i fafo a Ausetalia ma sui o le malo sa finau mo le to’alima lea ua toe faasa’oloto mai.

Fai mai Albanese o mataupu faapea e atagia ai le malosi o sootaga i upufai o malo ma le faaaloalo i le va o Indonesia ma Ausetalia.

Puna o Faamatalaga: https://www.9news.com.au/world/bali-nine-who-are-they-what-happened-everything-to-know-explainer/29ea1048-4832-43dc-b3fe-52285a4dab20