Ua aumai i se tulaga faalauaitele se finagalo tusitusia o le afioga i le Fofoga Fetalai susuga Papalii Li’o Oloipola Ta’eu Masipa’u, ua tali ai i se tuua’iga le moni a le taitai o le Itu agai o loo faamalolo lē tumau, ua ta’ua ai o loo faatonutonu atu e se minisita o le Kapeneta lana galuega.

Ua faaalia e Papalii ua faia e se tagata ni fesuiaiga i se ata ua salalau i le fesootaiga saoasaoa o le api o foliga, ua faaalia ai ni vaaiga lē sa’o ua atagia ai sea tulaga, peitai o loo faafofoga ma silasila le atunuu i auala o faasalalauga i le televise a le Malo, ma le api o foliga poo le facebook i le itulau a le Palemene, e leai ma ni vaaiga i ni tulaga faapea o iai.

Faaalia e le Fofoga Fetalai o le tulai mai o le faigamalo filifilia ua iai nei ua toe faafoi ai le tulaga tutoatasi o le Palemene aemaise o le va nonofo ai o le Fono Aoao Faitulafono ma le Pulega Faatonu.

O se faiga sili lea ona lelei e pei ona faaalia e Papalii ua le toe aiāina ai e le Kapeneta le faatonu folau o le Fofoga Fetalai i le lotoifale o le Palemene.

O tuua’iga a le susuga Tuilaepa L Sailele Malielegaoi, ua faaalia e le Fofoga Fetalai ua taitaiseseina ai le atunuu.