Ua faasoa solo i luga o le api o foliga poo le facebook e tagata, ata o le maota poo le fale o loo iai le faailoilo o le Fono Faavae a Faleata 1, ma se faasalalauga o loo aumai ai a se tasi o kamupani faatau fale ma fanua i Samoa, le Samoa Realty i le latou itulau i le facebook, mo le fia faatau ese atu o lenei fale ma le fanua 1/4 o loo tu ai luga.

O le fale o loo tu i Sinamoga, e 4 potumoe ma ua siomia atoa le fanua e le pa uaea, e $442,00 tala Samoa le tau o loo fia faatau ese atu ai lenei fanua ma le fale.

E tele ata eseese o lenei fale i fafo ma totonu o loo faasilasila mai ai, ma o loo maitauina ai lava o foliga tonu ia o fale o loo faaaoga mo fuafuaga o loo faaaogā ai mo le faagaioia o polokalame a Fono Faavae a Itumalo taitasi mo a latou miliona tala o loo faasoa atu iai e le faigamalo.

O se vaaiga e faate’ia ai le toatele na latou maua lenei faasalalauga ma ua tele ai foi faamatalaga ma tuufesili tagata pe iai se mea ua tupu i le Fono Faavae a le Itumalo o Faleata 1.

Sa taumafai e fesootai atu i Samoa i se sui o le Fono Faavae i numera e tolu o telefoni o loo faailoa mai luga o le laupapa faailo a le Fono Faavae e pei ona iai i le ata, peitai o loo tali mai le masini e lē o toe iai pe toe faaaogāina nei numera.

O le a toe saili pea se avanoa i se tasi o le komiti poo le afioga foi i le Tofi o le itumalo, ina ia maua ai se faamaninoga sa’o o lenei faasalalauga, ina ia tali ai foi le tele o le mau fesili ua fetuleni mai, ma fesiligia ai pe o maopoopo le Fono Faavae a lea itumalo, ae pe o aofia foi i le taiala o faiga faavae o lenei polokalame a le malo, lea faiga o le faatau ese atu o se fale lea sa faatupe atu i tupe o le poloketi le tapenaina o lea nofoaga.

O le a toe iai se faamatalaga atili o lenei mataupu.