Ua faasalalau nei e le Komisi o Galuega a le Malo le avanoa o le Faatonu Sili poo le Ofisa Sili o pulega o le Matagaluega o Soifua Maloloina ina ua mae’a le tolu tausaga aiaia o le konekarate mo lea tofiga e pei foi o isi faauluuluga o Matagaluega ma Faalapotopotoga a le Malo.
O le faaiuga o le masina nei o Me e faamuta ai le avanoa e tuuina atu ai tusi talosaga mo lea tofiga. O lea foi ua faasalalau avanoa o nisi o faauluuluga o matagaluega ma faalapotopotoga a le Malo ua mae’a le 3 tausaga o konekarate e pei o le Faalapotopotoga o Eleele a le atunuu le Samoa Land Corporation ma le Komesina o le Ofisa o le Komisi o Faigapalota.
Ua mae’a ona faia filifiliga o nisi avanoa o ofisa sili ae o loo tālia pea se filifiliga o se faauluuluga o le Matagaluega o Leoleo, Falepuipui ma le Ola Toe Fuataina lea na tapunia tusi talosaga i le masina o Novema o le tausaga na tea nei.
