Ua faasala le council a Hamilton ona o le alu o vai leaga e aofia ai otaota agai i le vaitafe.
$76,500 lea ua faasala ai le council ma e faapea e 9 aso le umi na tupu ai i le masina o Oketopa o le 2020.
I faamaumauga a le council pe ā ma le 1.27 miliona lita o vai leaga lea na alu i le vaitafe, ma o lea vaitafe e i lalo ane o le 2km le mamao mai le Waikato River.
Ta’ua e se sui o le council, o se lape i la latou itu e ui o lea e tele lava ina mulimulitaia tulafono ma taiala o puipuiga mo le siosiomaga.
Ae mai le faamasinoga faaitumalo i Hamilton ma lana faaiuga, o lea lava na iloa e le aufaigaluega a le council i le aso 6 o Oketopa le faaleagaina o le vaitafe, peitai faatoa faia iai se galuega ma taofia i le aso 12 o le masina lava lea.
Ua tuuaia ai e le faamasinoga le aufaigaluega i le lē lelei o fesootaiga, ma i iloiloga na faia e foliga mai ai o le aso 4 o Oketopa lea na amata faaleagaina ai le vaitafe.
