O aoga mo le lautele poo public schools uma i Ausetalia i Saute ua faasā ai ona toe faaaoga telefoni feaveai i o latou lotoā ma ua amata faamamalu lea tulafono mai le aso ananafi.
Fai mai le faigamalo a le setete ua faia lea tulaga ia faaitiitia ai le ituaiga amioga le lelei aemaise o faiga fia malosi ua fai ma faalavelave i totonu o potu aoga ma o le a faamamalu lea tulafono i aoga e 44.
Fai mai le minisita o aoga i lea setete o nisi o mataupu e alia’e ai i totonu o le aoga e mafua mai i le social media lea e faaaoga ai telefoni.
E le mafai ona faaaoga e le tamaititi aoga lana telefoni i le taimi o vasega poo le malologa foi.
O nisi aoga ua faailoa o le a faaalu foi a latou tupe e fai lelei ai se faiga e loka ai telefoni i le taimi o aoga.
Ua fuafua o le a maua se suiga lelei i lenei faaiuga ma faaleleia ai foi ma le taumafai a fanau aoga i mataupu o loo aotauina ai.
