E tolu fogafale, o faleaiga, ma pusa aisa tetele e teu ai oloa tuuaisa, ua fausia i totonu o le vaa fou laupasese ma uta le Lady Samoa IV, na tatala aloaia e le taitai o le Malo le afioga i le tamaitai Palemia, i se sauniga i le afiafi ananafi, Aso Lua, 1 Novema 2022.
E 280 le pasese e mafai ona malaga i le sa fou i le va o Apia ma Pago Pago, ma ua iai foi se nofoaga o ni potu mo pasese faapitoa. I le saunoaga a le Minisita o Galuega Tetele ma Felauaiga e iai ma le vaaia o le faalapotopotoga o vaa a Samoa le tofa Olo Afoa Fiti Vaai, na ia faailoa ai i le valaaulia na auai, o le tasi lea o aseta tāua a le Malo e tatau i le aufaigaluega o le a faaauvaaina, ona vaavaai lelei ma tausi faapelepele iai.
E lei faamautuina se aso e amatalia ai malaga a le Lady Samoa IV i le va o Samoa ma Amerika Samoa.
O le Aso Tofi na tea nei na taunuu ai le sa fou i o tatou gataifale ma tuta ai i le uafu i Matautu i Apia i le tuanai o le tolu vaiaso o folau mai Iapani sa fausia ai i se foai a lea Malo.
