I le aso lona lua mo le faagasolo ai o taualumaga o le fono a le Palemene o Samoa i lona tau faaiuiu, lea na fofogaina ai i le Maota le tulafono taufaaofi i lona faitauga faalua o le tulafono e toe teuteu ai le tulafono o Taui ma Faalavelave Faafuasei 2023.

E pei ona saunoa faamalamalama  ai le Minisita e patino ai le vaega o Taui mo Faalavelave Faafuasei, Leatinuu Faumuina Wayne Sooialo e tusa ai ma lenei teuteuga.

“O le autu tonu o le tulafono faaofi o le faapoopo o se faiga fou o taui mo manu’aga mai taaloga, poo taui fou mo i latou ua aafia le soifua le tino i ni manu’aga mai taaloga ina ia maua le taui mo tagata taaalo ua famanu’alia i soo se taaloga o loo lesitala i lalo o lenei taui fou.

“O lona uiga e iai foi le lesitala i lalo o tulaga ia i le MCIL poo taaloga o faaaogaina ina ia mafai ona maua ai se faamanuiaga.

“Ia faia se tulafono faatonutonu ina ia mafai ona faatonutonu ai lenei tulafono ma mafai ona faatino ai auā foi le taui mo manu’aga ia mai lea taimi.

“O lona uiga o loo aumai lava o le tulafono fou ua faaopoopo auā foi se fesoasoani ia i latou ua iai manu’aga ona o taaloga.

“Ou te talitonu, tasi lenei o tulafono e pito sili na aogā aemaise foi le faaaogaina o ni seleni o loo nofo ma le matagaluega e patino ai lenei tulafono ina ia mafai ona faasafua atu i tua nei faamanuiaga.”

O lenei faiga fou sa lagolagoina e le Maota ma na saunoa foi lē sa avea ma Minisita na gafa ma lenei vaega o le sui Faipule a le itumalo Satuipatea, Afioga Lautafi Fio Selafi Purcell, sa taumafai foi i le tuuina mai o lenei tulafono i le Palemene a o tu mai i le foe.

“O le tulafono lenei sa amata i le vaitaimi a o minisita o le ACC ae na taumafai a e oo mai le Palemene ae ua oo le taimi ua lalata le faigapalota ona manatu lea o le malo e faataatia ese ae faafetai i le minisita ua oo mai lenei mataupu.

“O se tulafono na ou matuā fiafia tele ina ua avatu e le matagaluega ona o se tulafono ua leva ona tatau ona iai taui mo nai alo ma fanau o loo aafia lo latou soifuaga i mea nei o taaloga.

“O le tele o aiga o le vaega lea o loo maua ai le tamaoaiga o le itu tau taaloga ae o aafiaga mai manu’aga o nisi ua faamuta ai le taumafai ona e lei iai se scheme faapea e fesoasoani i le taimi e toe faaleleia ai poo therapies e toe faafoi ai le malosi i le tagata taalo.” 

Na toe saunoa Leatinuu i nisi foi o manatu ma fautuaga sa faaalia e se tasi o sui Faipule e faaopoopo ai ma se taui mo fai faatoaga ma faigafaiva.

“O lenei faalapotopotoga e ese ma le tāua ae e vaapiapi le mea e aogā iai, e iai isi tagata faigaluega e pei ona silafia e uma lelei manu’aga ma le soifua auauna e lei iai se mea o maua ai ae o le mea pito sili ona tāua o lea ua amata ona auaua’i mai.

“E iai foi se finagalo i le Malo e toe review atoa tulafono a le ACC ia se’i iai se tausaga toe tilotilo lelei lea iai auā foi nisi faamanuiaga.”