O le taualuga ai o le vaiaso faamanatu o le siosiomaga i le atunuu i le Aso Faraile ua mavae nei na tuuina ai le laufanua vailaloa ua faaigoaina o Vaipu i le lisi o faasao o laufanua vailaloa i le lalolagi o loo avea ma faasao.
O lenei laufanua vailaloa o loo taoto i se nofoaga i le itu i Sasae o Upolu ma o loo ola lauusiusi ai laau ma o se nofoaga mo manu eseese o loo ola ai e pei ona faamauina e se pepa o faamatalaga faalauaitele e le Ramsar Convention o se feagaiga faavaomalo mo le faasaoina lea o laufanua vailaloa i soo se atunuu o le lalolagi.
O vaega o loo siomia ai lenei laufanua vailaloa o loo iai toega o Vaigafa ma Mauga o Alii o nofoaga sa avea ma afioaga i aso anamua.
O loo mataituina pea ni vaega e ono lamatia ai lenei faasao ma o loo galulue soosootau’au ai le Matagaluega o Siosiomaga ma afioaga o loo iai lenei laufanua vailaloa ina ia faatumauina le faasao lenei.
Ua tolu ai laufanua vailaloa i le atunuu ua lisiina nei mo le faasaoina e aofia ai Lanutoo, O le Pupu Pue ma le Vaipu.
