Ua toe faaaoga le malaevaalele i Fagalii na toe faia iai galuega mo le faaleleia i le tau e silia i le 2 miliona tala.
O lea ua toe faaaoga mo malaga i le va o Samoa ma Amerika Samoa ae ua sii ai ma le totogi o pasese e pei ona faailoa e pulega o kamupani vaalele o le Talofa Airways ma le Samoa Airways.
I le toe afea ai o Fagalii e malaga a vaalele i le Aso Lua o lenei vaiaso, o le Talofa Airways ua 91 tala ua siitia ai le pasese o le alu ma toe foi mai poo le roundtrip.
O le totogi aofai sa iai e $676 tala ua siitia nei i le $767 tala i malaga e lua.
O le kamupani vaalele o le Samoa Airways e 13 tala le siitaga o lana pasese mo faigamalaga o le alu i Tutuila ma toe foi mai i Apia.
O le tau atoa o le malaga e $835 tala faatusa i le $822 tala sa iai mo le alu ma le sau a o lele mai Faleolo agai i le malaevaalele i Tafuna.
O le toe faaaogaina o Fagalii ua faaopoopo ai nisi o auaunaga mo le mataitu o tulaga i le puipuia lelei o uta feaveai i le va o Samoa e lua, e pei ona iai le masini fā’ata e siaki ai uta ma ato.
