O loo faaaopoopo pea tagata ua tatau ona faamavae mai i le lisi a le pulenuu filifilia a Aukilani, Wayne Brown.
O lea ua valaau mai Brown i le laulau a fono atoa a le Eke Panuku ua tatau ona faamavae ese uma latou.
O le Aso Gafua lea na faatonuina ai le tatau ona alu o le pule sili ia Paul Majurey o le Eke Panuku, a o lea ua Aso Faraile ane o le laulau a fono atoa.
Saunoa le pulenuu filifilia o loo tumau lava lana faaiuga ma o lea na faateia o ia ina ua vaai i tupe a ratepayers a Aukilani o loo toe maua mai le Eke Panuku.
E oo mai ananafi o lea foi ua mae’a totofi le vaega faufautua a le pulenuu filifilia mo le taimi nei, lea o le a vaai ai e le ulugalii ia Tim Hurdle ma Jacinda Lean le aufaigaluega, ae o Mathew Hooton o le a faauluulu iai fesootaiga ma aiaiga faavae.
O le toatolu foi lea na galulue vavalalata mai ma Brown i taimi o faatosina o le faigapalota.
O le vaiaso nei o lea na feiloai ai Brown ma councillors taitoatasi aemaise ai o le talanoa o tala o tupe, ma o loo fuafua o le vaiaso fou e faataoto ai fuafuaga e tatau ona faamuamua e faalapotopotoga o loo pulea a le council.
