Ua 57 nei tausaga talu ona talia e le Malo o Samoa le fesoasoani a le Malo tele o Amerika o alii ma tamaitai pisikoa mai lea atunuu e galulue i Samoa.
O le Aso Lua o le vaiaso nei na faafeiloai ai e le Matagaluega o Aoga ma Aganuu le vasega 94 o pisikoa Amerika i se ‘ava o le feiloaiga, ma o se sauniga sa auai ma le Amepasa o Amerika o Tom Udall e faamautu i Niu Sila.
O le a galulue le toasefulufa o pisikoa fou i le a’oa’oina o le faitau ma le tusitusi i le gagana Peletania i nisi o aoga tulagalua i nuu ma itumalo.
O le a muamua auai i latou i se polokalame faamasani i le tu ma le aganuu ma le olaga i Samoa lea o le a nonofo ai i nisi o aiga o nuu ma afioaga ua filifilia, a o lei amata ona galulue i aoga tulagalua ua filifilia e faatino ai le latou galuega fesoasoani.
