O sauaga e tutupu i le lotoifale o nisi o aiga i lo tatou atunuu ma aafia ai le va o ulugalii, toe aafia atu ai ma nisi o fanau teine laiti i gaioiga solitulafono tau feusuaiga fai faamalosi ma faiga matagā, ua faafetaia ai e le Peresetene o le faalapotopotoga o le Toomaga mo ē Puapuagatia le latou galuega fai faatasi ma le matagaluega o leoleo, i le vave tali atu i le faia o suesuega.
E le gata ina faaalia e le Peresetene le faletua ia Siliniu Lina Chang lea galulue faatasi ma leoleo pe a oo ina oo atu se mataupu, ae o nisi o aiga talu ai nei na aafia laoa ma maota i faalavelave tau mu, na vave tali atu foi le au Samaria agalelei ma pisinisi i foai o taumafa ma lavalava.
O le tulai mai o ia faaletonu ma aafia ai le soifuaga solo lelei o nisi o o tatou tagata, ua faaalia e le Peresetene o le isi lea galuega o loo feagai ma sui auai o le Toomaga i totonu o nuu ma afioaga o le tali atu i se taimi vave pe a oo ina logotala i se faafitauli ua tulai mai i totonu o nuu ma afioaga.
Se faatalatalanoaga ma le faletua o Siliniu Lina Chang o le Peresetene o le Toomaga mo ē Puapuagatia.
