Ua toe faalauiloa e le Komiti o Faatonu a le Kamupani o Pulega mo Faaputugatupe Teufaafaigaluega o Mavaega Tausi a Samoa faapea le Tausi Mavaega, le UTOS se isi tausaga manuia mo le Faaputugatupe ina ua latou faamaoniaina le $8.5 miliona tala o le a tufatufa atu i sui faiuinite i le mae’a ai o le tausaga faaletupe i le aso 30 o Iuni 2023.

O lenei tufatufaga ua sili atu nai lo o le tufatufaga i le tausaga ua tuanai atu, lea sa ausia ai le $7.5 miliona, ma ua faamauina o se matati’a fou lenei ua ausia talu ona faavae mai le Faaputugātupe i le 2010.

O sui faiiunite sa iai latou teugatupe e oo mai le aso 30 o Iuni 2023, o le a agavaa i le 8 sene i le iunite mai lea tufatufaga ma o le a mafai ona tala uma i tua a latou tufatufaga, pe toe tului i totonu o a latou teugatupe e amata atu le aso 10 o Iulai 2023. A faa-pasene e 10.95% le aofaiga o faamanuiaga mo lenei tausaga ma e 1.7% ua siitia ai pe a faatusatusa i le tausaga faaletupe sa faaiuina ia Iuni 2022.

Ina ua toe tatalaina tuaoi mo faigamalaga mai Samoa ia Aokuso 2022, ae o loo faaauau pea ona sailiili e le Faaputugatupe Teufaafaigaluega o Mavaega Tausi a Samoa nisi avanoa faaopoopo e ono maua mai ai nisi tupe faasili mo ana sui faiiunite ma ana paaga masani, ae o loo faaauau pea ona mataituina vaegatupe o loo teu faafaigaluega i le taimi nei, ia mautinoa le ausia o se siitaga o tupe maua mo le aufaiiunite.

O loo faaauau pea ona faalauiloa e le Kamupani o Pulega le malupuipuia o ana tupe teu faafaigaluega e pei ona iai lenei taunuuga lelei o galuega faatino a le Faaputugatupe.

E ui o loo pagatia pea si o tatou atunuu ma le lalolagi atoa ona o aafiaga o le faama’i o le Koviti-19, ae peitai, na mafai lava e le Faaputugatupe ona ausia ni taunuuga lelei mai ana galuega faatino i totonu o nei tausaga e tolu. 

Mo le silafia o le UTOS o se tasi o auaunaga tuma’oti tau tupe a le Malo o loo teu faafaigaluega ai tupe a tagata taitoatasi, ma faalapotopotoga tuma’oti faapea ma ekalesia.