Ua iai nei le isi talavou ua faaopopo atu i tagata ua molia i le fasiotia o se tamā na maua atu ua maliu i lona fale i Western Sydney.
E lei mafai e le vaega o fesoasoani faavavave ona laveai si tamā o Ashley Mundy 32 tausaga ina ua taunuu atu i lona fale i Tregear i le aso 10 o Iuni ina ua valaau ane i latou mo se fesoasoani.
Fai mai leoleo o loo feta’ua’ina sa iai se vevesi na aofia ai lē ua maliu ma o le aoauli la ananafi na pue ai e leoleo se talavou 19 tausaga mai Toukley ma molia i le fasioti tagata.
Ua faaopoopo atu ai ia moliaga i isi talavou e toatolu na molia foi i le faalavelave lava lea ma ua ta’ua sa nonofo uma ai i lea fale.
O le isi talavou e 18 tausaga o Dylan Aldred sa tulai i le faamasinoga i Paramatta i le aso 12 o Iuni ma teena ai le tatalaina i tua ma e toe tulai i le faamasinoga i le aso 11 o Aokuso o loo molia foi i le fasioti tagata.
O le talavou sa pueina ananafi sa tulai i le asō i le faamasinoga i Wyong.
