E lua tausaga ua faaopoopo i le faasalaga faafalepuipui o le tamā o Malu Palu poo Alae Palu sa ia ioeina moliaga o le umia o le pauta faasāina o le ‘aisa, ma e faatoa tuli lona faasalaga lea pe a mae’a le taimi o lona faasalaga o loo tuli mai se isi solitulafono na faasala muamua ai e le faamasinoga.
O le tasi o tamā o Faamatala Ainuu sa molia faatasi ma Malu ua faamaonia lona umia o paipa e fesootai i le faaaogāina o le ‘aisa ae ua laki ua lē falepuipui, ae ua faasalatupe e tasi le afe lima selau tala.
E iai le tamā e toatolu ai i latou na molia i le umia o le ‘aisa i se osofaiga a leoleo i se fale o se aiga i Faatoia ia Iulai o le tausaga na tea nei, ae o loo tetee i moliaga ma o loo tālia le taimi e valaau ai molimau a leoleo.
O le lē utuva o osofaiga a leoleo ma maua ai le pauta faasāina o le ‘aisa, ua faailoa e se tasi o auaunaga tuma’oti o loo ave iai tagata solitulafono o laau ma pauta faasāina mo ni aoaoga ma toe tau faufau ai le olaga mai le tagofia o nakoti, le polokalame lea o le Salvation Army ua faamauina le faatupulaia o le solitulafono o le tagofia o le ‘aisa.
