Ua lē lava le 5 miliona tala na pasia i le tala autu o le tupe mo le tausaga faaletupe o loo faagasolo, mo le polokalame a le Malo o loo ave ai i fafo gasegase e le mafai ona togafiti i le auaunaga a le soifua maloloina i Samoa, e sailiili matagi ai mo ni togafitiga faafomai.

O le mafuaaga lea o le faia o se faaiuga a le kapeneta e to mai se 6 miliona mai vaegatupe lē fuafuaina e faaauau ai lea polokalame tāua, o loo sulufai ai le atunuu i se fesoasoani a le Malo mo le togafitia i fafo o gasegase tuga e pei o le fatu, ma le kanesa ma isi gasegase e le o mafai ona maua i Samoa se laveai.

Ua faailoa e le taitai o le Malo le afioga i le tamaitai Palemia, o le tausaga faaletupe ua mae’a e valu miliona na faaagaga mo le polokalame peitai i le tausaga faaletupe o loo faagasolo o lea faatoa mae’a le tolu masina ae ua uma le vaegatupe sa fuafuaina ae e le mafai ona tuua ai le tāua o le polokalame o loo maua ai le fesoasoani.

Le tamaitai Palemia, Afioga Fiame Naomi Mataafa.