Ua amatalia lenei masina fou o Aokuso ma le faagaioia ai o talosaga masani mo le polokalame nofomau i Niu Sila poo le Samoan Quota Scheme lea ua lua a’i nei tausaga ua toe tatala, i le tuanai o le tausaga e 2020 e oo mai i le tausaga e 2021 o tapunia lē tumau ona o le faama’i Koviti-19.
Talu ai lea tulaga ua faaopoopo ai ma talosaga nofomau mo Samoa mai le 1,100 sa iai i le 1,650.
O lona uiga e 550 avanoa ua faaopoopo lea na amata faatino i le tausaga na tea nei.
O suiga fou i le faagaioia o talosaga nofomau o le faaaogā lea o fesootaiga faatekonolosi i masini komepiuta e faatumu ai talosaga ma lafo i le ofisa o femalagaa’iga a Niu Sila, o se faiga ua faaalia e le vaega o femalagaa’iga a lea Malo ua sili atu ona lelei ma saogalemu.
O le faaiuga o le masina nei e mae’a ai le avanoa e tuuina atu ai talosaga nofomau, ae o le aso 6 o le masina o Oketopa o le a faia ai le se’i ma iloa ai talosaga o le a faamanuiaina.
E lei manuia sailiga mo le fia maua o ni faamaumauga mai le vaega o femalagaa’iga a Niu Sila i se aofaiga o talosaga nofomau mai Samoa na faamanuiaina i le sei o le tausaga ua mavae, ae fia foi talosaga ua mae’a ma ua faamalieina aiaiga uma o talosaga nofomau.
