Ua silasila le matagaluega o le soifua maloloina i ni avanoa sili ona vave ma lelei e aumai ai uta o vai ma fualaau faafomai mo lo tatou atunuu, ina ia taofia ai le tulaga o le alu alu lē maua ia vaega tāua i nisi taimi.
Ua faailoa i se lipoti a le leitio a Niu Sila le agai o se fuafuaga a le Matagaluega o le soifua maloloina i lo tatou atunuu, i le okaina o vai ma fualaau faafomai mai Niu Sila ma Ausetalia.
Ua faailoa e le Faatonu Sili o le soifua maloloina i lea lipoti o se tasi lea o laasaga e ono oo iai, i se taumafaiga e saili nisi auaunaga e vave maua ai uta o vailaau faafomai mo togafitiga faapea foi fualaau, auā e iai taimi e faaitiitia iai le maua o ia vaega tāua.
O loo iai foi se taumafaiga a le pulega o le soifua maloloina e faatalatalanoa auaunaga tuma’oti a fale talavai i lo tatou atunuu i se taumafaiga e taofia le toe faaitiitia o nisi o fualaau ma vai e togafitia ai gasegase.
O fuafuaga tau tupe a le Malo i le tausaga e 2022 e 3 miliona tala Amerika sa faatatauina mo le faatau mai o vailaau faafomai ma fualaau mai fafo.
