O le fuafuaga a le sosaiete a foma’i i Samoa e faatino i le vaeluaga o le po o le Aso Faraile le aso mulimuli o Iuni lana teva e ala i le na o le 8 itula o le ao e galulue ai, ae malolo uma isi itula o le aso mai le afiafi e oo i le po ma faaiuga o le vaiaso, ua mataitu nei e le Malo aemaise le pulega o le matagaluega o le soifua maloloina pe taunuu.

O le saunoaga tali a le Minisita o le Soifua maloloina i le Palemene le afioga Valasi Luapitofanua Toogamaga Tafito Selesele, na ia fofola ai le taotoga o le mafuaaga o le gaioiga a le sosaiete a fomai, ma taumafaiga a le komisi e pulea galuega a le Malo e faamafolafola uma itu o le mataupu i totogi ma alauni faapea itula faasili poo ovataimi, ma le tuai ona faataunuu loa o le toe tasi o le pulega o le soifua maloloina ma see atu e faatonu folau i tulafono ma taiala a le komisi ae lē o taiala o tulafono sa pulea ai le matagluega a o mavaevae le pulega o le matagaluega le ministry of health ma le auaunaga faasoifua maloloina le national health service. 

Le afioga i le Minisita o le Soifua Maloloina, le Afioga Valasi Luapitofanua Toogamaga Tafito Selesele.

O le saunoaga a le taitai o le malo na taualuga i ai taualumaga a le Palemene i le po anapo ina ua ta le sefulumalelua, na ia afea ai le mataupu lava lenei i totogi o foma’i.

O le tuualalo a le afioga i le tamaitai Palemia i le asosi, pe lē ua lava ea faamanuiaga ua latou maua, auā o loo tau fasoasoa le tamaoaiga o le atunuu, aemaise o Samoa e lē o se atunuu e malosi lona tamaoaiga.

Le afioga i le Tamaitai Palemia, le Afioga Fiame Naomi Mataafa.