E to’a 25 tagata faigaluega a le Mālō poo frontliners na galulue i le taunuu ai o se vaa la’u oloa mo uta containers mo le atunuu ua faanofoesea nei ina ua faamaonia le aafia o nisi o le auvaa i le koviti19.
O lenei mataupu na faailoa e le tamaitai Palemia Fiame Naomi Mataafa i lana feiloaiga ma Tusitala i le vaiaso na tea nei. I le ripoti a le NEOC le Komiti o Faalavelave Faafuasei e faapea e to’a fā sui o lea auvaa lea na taula i le uafu i Matautu i le Aso Lua o le vaiaso na tea nei ua aafia i le koviti19.
Ina ua maea ona tuu ese le uta oloa mo Samoa na faaauau loa le malaga a lenei vaa la’u oloa i Amerika Samoa. O siaki na faia i Amerika Samoa na faamaonia ai le aafia o sui o lea auvaa i le vairusi.
Ona o ia iuga o suega na logoina ai e Amerika Samoa le Mālō o Samoa tulaga ua iai sui o le auvaa ma fai ai loa le faaiuga a le NEOC e faailoa uma i latou na galulue i lea taimi na faanofoesea mo le saogalemu o le atunuu atoa.
E 2 vaiaso o le a faanofoesea ai tagata faigaluega a le atunuu ma i le taimi nei e le’i faailoa mai e le NEOC tulaga o iuga o a latou suega.
