O le soifua maloloina ma a’oa’oga o loo tu maualuga pea i fuafuaga o faiga faavae o le atina’e o le tatou atunuu e pei ona faailoa e le taitai o le Malo le afioga i le tamaitai Palemia, i lana saunoaga faamanuia o le Tausaga Fou 2024.
O le atinae foi o le tasi le miliona tala mo itumalo faapalota e 51 o se isi lea o taumafaiga a le Malo ua ave ai le tuualalo a le Palemia le afioga Fiame Naomi Mataafa i le atunuu e manaomia le galulue faatasi ai o pulega a alii ma faipule o nuu ma afioaga ina ia ausia le manulauti o lea faiga faavae o le atinae mo le manuia o tagata uma.
O le saunoaga faamanuia foi a le taitai o le Malo na momoli ai le faafetai i vaega uma o le Malo aemaise le aufaigaluega, faapea lo tatou atunuu ona o galuega ua mae’a o le tausaga 2023 ma le faamoemoe ia faaauau pea le galulue soosoo tau’au o vaega uma o le atunuu ma le Malo.
O se vaega o le saunoaga faamanuia a le afioga i le tamaitai Palemia le afioga Fiame Naomi Mata’afa na ia faailoa ai le amatalia o le vaiaso o talosaga ma anapogi i le Aso Sa muamua o Ianuari ma faaauau ai seia mae’a i le Aso Faraile 12 o Ianuari 2024.
O se vaiaso tāua i le kalena amata o le tausaga e moli talosaga ai le atunuu atoa e talosia le folauga o le tausaga fou ina ia malutia Samoa i aao alofa o le Matai sili mai mala faalenatura ma faalavelave faafuasei.
