O le auaunaga fesoasoani mo se suiga e ta’ua o le Digicel’s Change Maker Day ua tatala i le galuega fesoasoani mo se suiga lelei i totonu o le nofoaga mo fanau ma tina ua sauaina le Campus of Hope i Tuanaimato o loo faagaioia ma vaaia e le Toomaga mo ē Puapuagatia.
O le Faatonu o le kamupani o le Digicel i Samoa ma isi atunuu o le Pasefika o loo iai le auaunaga a le kamupani le afioga Pepe Christian Fruean ma se vaega toatele o le aufaigaluega na faaavanoa o latou taimi e faatino ai lea fesoasoani mo se suiga e ala i le faamamāina o le lotoā atoa, ma maua foi le taimi e fesoasoani ai i galuega o le nofoaga e pei o le vaaia o pepe i le nofoaga o loo tausia ai tina ma tamaitai ua ma’itaga ma maua pepe ona o faiga faamalosi solitulafono.
Na faaalia e le Peresitene o le Toomaga, le faletua o Siliniu Lina Chang, o le tuu atu o le tau’au o le kamupani ma faia se galuega lelei i le nofoaga o se faamāmā avega sili lea, i le aufaigaluega o loo vaaia le nofoaga i aso 24 itula fitu aso o le vaiaso.
Ua atofaina nei e le Digicel Samoa le aso 5 o Iuni o tausaga taitasi e faia ai lea polokalame e fesoasoani ai i tagata ma faalapotopotoga tuma’oti e pei o le Toomaga, o loo faia auaunaga mo le manuia o tagata lautele.
