O faamai lē pipisi ua avea ma popolega i le Malo ona e le o faaitiitia ae faateleina pea le numera o tagata e ave i fafo mo togafitiga.
O se tasi o itu ma’ale’ale i lea tulaga o le siitia ma le faaopoopo ai pea o tupe e faaalu e le Malo mo le faia o ia togafitiga.
Ua faaopoopo ai ma popolega i le toatele o tupulaga talavou e aafia i gasegase le pipisi e tuga auga ma ua ave i fafo e togafiti ai.
Talu ai nei i le feiloaiga a tusitala ma le taitai o le malo le afioga i le tamaitai Palemia, na faaalia ai e le afioga Fiame Naomi Mataafa, o se faaletonu lenei ua tatau ona silasila iai le atunuu atoa ona o faamai le pipisi e mafua mai i suiga o le soifuaga ma le tele o meaai eseese ua taumamafa ai tagata.
O loo i tagata o le atunuu le fofo o taumafa eseese ua mafua ai gasegase le pipisi e pei o le suka, toto maualuga, faaletonu fatuga’o, tino puta, ma gasegase o le fatu.
Talu ai nei e 13 gasegase na auina i fafo i le polokalame fesoasoani a le Malo ma e toatele i tupulaga talavou.
Ua faasolo ina taugata ma siitia le totogi o togafitiga i fafo o gasegase ma e pine faamau lea tulaga i le faaopoopo o isi tupe e le Malo i le ave o gasegase e togafiti i fafo, i le tausaga faaletupe o loo faagasolo nei.
E 16 miliona tala le tupe ua faaagaga nei mo siiga gasegase i fafo e totogi e le Malo mo le tausaga faaletupe 2022 i le 2023 ma ua aofia ai le 5 miliona tala na faaopoopo talu ai nei i se faaiuga a le Kapeneta.
