O le aso 24 o Mati le aso mulimuli o le tamaitai Faamasino o le Faamasinoga Maualuga, Justice Tafaoimalo Tologata Leilani Tuala-Warren.
I le faatalanoaga ma le tamaitai Faamasino, na ia saunoa ai, e le faigofie lana faaiuga e pei o le faasee atu i Niu Sila, ae o ni mafuaaga e totino ia te ia ua ia faia ai lenei faaiuga.
Ua tuuina atu lana faamavaega mai le Faamasinoga, ae malaga i Niu Sila ina ia faatasia ma si ona aiga.
Ua iloga foi le sao o lenei tamalii i le faamasinoga Maualuga a Samoa, e pei ona amata ai lana galuega o se faamasino i lea Faamasinoga i le tausaga e 2016, ma o ia le faamasino tamaitai lona lua i le Faamasinoga Maualuga a Samoa.
O Justice Tafaoimalo na faauu mai i lona faailoga o le Bachelor and Master of Laws mai le University of Waikato, ina ua mae’a ona faauu mai lona faailoga o le Bachelor of Economics mai le University of Sydney i Ausetalia.
Talu mai le 1998 na amata galue ai Tafaoimalo i le vaega o tulafono ma mataupu tau faamasinoga i lona tulaga o se loia, ina ua amata i le ofisa o le Loia Sili, sosoo ai ma le galue i le ofisa loia a le latou aiga ma lona tuagane, le Tuala and Tuala lawyers.
O le tausaga e 2008 na tofia ai Tafaoimalo e avea ma uluai Executive Director o le Samoa Law Reform Commission, a o lei tofia ai e le Faamasino Sili i lena taimi, Chief Justice Patu Tiavaasue Falefatu Maka Sapolu, e avea ma faamasino i le Faamasinoga Faaitumalo a Samoa i le tausaga 2013, i le avea ai ma Faamasino autu i le Faamasinoga o Aiga le Family Court ma le Family Violence Court. O iina foi sa tele ai le aafia o Tafaoimalo i galuega sa ia fesoasoani atu ai i le faalapotopotoga o Toomaga mo ē Puapuagatia le Samoa Victim Support Group.
Na iloga foi le tulai mai o Tafaoimalo o ia o se tasi o faamasino autu na seei i mataupu na iloiloina ai le Faavae (Constitution) i le taimi o faagasolo mataupu e fesootai atu i le iuga o le Faigapalota Aoao a le atunuu i le 2021.
O le tausaga talu ai 2022 na faaee atu ai ia te ia le faailoga taualoa ona o lana auaunaga iloga mai le Iunivesite o Waikato.
O Justice Tafaoimalo Tologata Leilani Tuala-Warren e faaipoipo atu ia Judge Aidan Warren o se alii Faamasino i le Maori Court of NZ. E toafa o la alo, o Tatiana, Phillip, Mahina ma Misiviliamu.
O ia o le tuafafine o le afioga i le alii loia, Tupuivao Alvin Tuala o lē na avea ma CEO o le kamupani vaalele a le atunuu le Samoa Airways, faapea le alii loia le afioga Tuala Siaki Tuala, o le CEO o le Samoa Gambling Authority, ae o le alo tamaitai e toatasi i o latou mātua, le susuga i le alii fomai, the late Dr Misi Tuala ma le faletua ia Aruna Tuala o Falelatai, Sapapalii, Satalo ma Safaatoa Lefaga.
