O le afioga ia Aiono Mose Su’a o se sui ua leva ona tautua i le atunuu o le taitaifono o le Komisi o Tagata Faigaluega a le Malo lea na tuuina atu lana tusi faamavae i le Aso Gafua 26 o Iulai 2021.
Na faamaonia mai e le sui o le Komisi le afioga ia Auelua Samuelu Enari lea faamavae ai o Aiono ma ia faapea e leai se sootaga o le faamavae ai o le taitaifono ma le suia o le malo i le vaiaso nei.
Taua e Auelua “Na talosaga e le Palemia i lena taimi ia Tuilaepa le afioga ia Aiono ina ia tauaveina le tofi i le tausaga e 2018 ma ua leva ona fuafua e faamavae mo se taimi umi”.
O Aiono ua loa lona tautua i le atunuu , e silia ma le 20 tausaga na avea ai o ia ma Ofisa Sili o le Matagaluega o le Va i Fafo (MFAT) ma e le’i toe taumafai e apalai mo lea tofiga i le tausaga e 2016 e ui i lea na toe aveesea mai o ia mai le avea ma sui litaea i le tausaga e 2018 ina ua talosaga ai Tuilaepa e na te tauaveina le tofi taitaifono o le Komisi o tagata faigaluega a le malo.
Taua e Auelua o le afioga ia Lauano Vaosa Epa o le a nafa ma le faagasoloina o le auaunaga a le Komisi mo le taimi nei.
