Ua faamavae lē sa tauaveina le tofiga taitaifono o le Komisi o Galuega a le Malo le afioga Lauano Vaosa Epa, o se tasi o tina o le atunuu ua loa tausaga o tautua i le Malo ma le atunuu e le gata i lea tofiga ae sa faauluulu foi iai le Matagaluega a le Palemia ma le Kapeneta i ni tausaga ua mavae.
O lona tuua o le tofiga, ua filifilia ai se tasi o Komesina o le Komisi le susuga Nonu Lemauga Saleimoa Vaai e avea ma taitaifono fou. Ua filifilia ai foi ma ni komesina fou se toalua e atoa ai le toatolu o komesina o le komisi o galuega a le Malo, oi laua ia le faletua le afioga Gatoloaifā’ana Tilianamua Afamasaga, ma le afioga Fonoti Perelini Perelini.
O le feiloaiga a le Palemia ma le vasega o tusitala ma le aufaasalalau na ia faailoa ai lea filifiliga ua mae’a ona faamautu i se ioega a le Kapeneta.
O nisi o tofiga ua faailoa foi e le tamaitai Palemia, o sui fou o le Komiti Faufautua o Totogi poo le Remuneration Tribunal, ua avea ai le afioga Tuala Farani Chan Tung e avea ma taitaifono. Ua sui tulaga o ia i le afioga Aliimuamua Esekia Solofa ua tuumalo.
O le tasi sui fou o lea komiti o le afioga Mua’ausa Joseph Walter, ma le sui na filifilia i le tausaga na tea nei o le tofa Tuiloma Sina Retzlaff. O le Komiti Faufautua o Totogi e gafa ma le galuega o le iloiloina o totogi o tagata faigaluega uma a le Malo, e aofia ai tofiga o le Ao o le Malo, ma le sui o le fono a sui tofia.
