Ua mautū moliaga e 13 a leoleo faasaga ia Pokati Tu’u poo Pokati Faatau’ī, ua 58 tausaga le matua o Fasitoo uta, o loo tuua’ia i le maliu o se alii leoleo ma se tama tane o le nuu o Nofoalii.
O le Aso Gafua o lenei vaiaso na toe valaau ai moliaga o lē ua molia ma faailoa ai e loia a leoleo le mae’a ona faamautū a latou moliaga, e aofia ai moliaga o le fasioti tagata faamoemoeina, umia o se a’upega mata’utia o se laau malosi, faaoolima, umia o ututau, ma le moliaga o le fasioti tagata pa’ivalea.
Ua tuu avanoa nei le faamasinoga i le loia ua filifilia e tauaveina moliaga o Pokati, e tapena ai se tali a lē ua molia i moliaga.
O le isi lua vaiaso o le a toe valaau ai ma e tatau ona faamautu ai se tali a lē ua molia pe na te talia pe teena moliaga uma a leoleo.
