Ua faamautu nei le sainia i Apia o le maliega ua ta’ua o le Samoa Agreement, o le a sui a’i le maliega sa faaigoaina o le Cotonau Agreement, o se maliega i le va o le Iuni a Europa ma atunuu Aferika, le Atu Kerepeane ma atunuu o le Pasefika.
O le fā tausaga ua mavae na faamautu ai le sainia mai i Samoa o le maliega lenei mo atunuu e 106 peitai e iai vaega sa faatuai ai ona faatino le sainiga o le maliega, le mafuaaga o le faatoa faatino o lea fuafuaga i le aso 15 o le masina nei le Aso Lulu lea o le vaiaso asau.
O se tasi lea o maliega e avanoa ai ona faamatuu mai fesoasoani a le Iuni o Europa mo galuega o le atinae o tamaoaiga o atunuu Aferika, Kerepeane, ma le Pasefika.
O Samoa na ofo e talimalo i le sainiga o le maliega, ae na faatoa faamautu ia Tesema o le tausaga na tea nei, ina ua faamaonia e le fono a Minisita o atunuu Aferika, Kerepeane ma le Pasefika.
O se tasi lea o taligamalo tele a Samoa o le a malaga mai ai sui o atunuu Aferika, Kerepeane ma le Pasefika faapea ma sui o le Iuni a Europa e faatino le sainia o le maliega.
Ua faailoa e le taitai o le Malo le afioga i le tamaitai Palemia i se pepa o faamatalaga, o le faia mai i Samoa o lea faatasiga tele a malo o le lalolagi, o le a faamautu ai le Pasefika lanumoana le Blue Pacific ua avea nei ma taulaiga o fuafuaga o le atinae manuia o tagata o lenei itu o le lalolagi.
