E tasi le miliona, selau sefuluvalu afe, valusefulu fitu tala ma le 50 sene, le tau ua manumalo ai le Konekarate o le Tinai, Gordon & Associates Limited – TGA Ltd, na te pulea ai le galuega o le fausia o se maketi fou i Savalalo, lea ua faatupe e le Malo o Niu Sila i le 12 miliona tala tupe Niu Sila, ma le sao o le Malo o Samoa e 10 miliona tala Samoa.
Ua faailoa e le pulega o le faalapotopotoga o eleele a Samoa le Samoa Land Corporation, e lima konekarate sa tuuina atu a latou ofo mo le pulea o le galuega poo le Project Manager, ae na filifilia ai le konekarate a se tasi o tamalii o le atunuu le susuga ia Leiataua Tom Tinai ma nisi o tamalii e iai tomai a’oa’oina i galuega tetele latou te pulea ai le faatinoina o lea galuega tele.
O lea konekarate ua silia i le 30 tausaga o tautua i auaunaga i le fausia o nisi o galuega tetele i lo tatou atunuu ma ua umia foi tomai a’oa’oina ma faailoga i le faia o galuega tetele faapea, aemaise o lo latou tomai i tulaga tau inisinia i le fausia o fale ia malolosi ma mafai ona puipuia mai aafiaga o ni mala faalenatura e pei o afa, lologa, ma mafui’e.
O pepa mo le vaega mulimuli o le galuega lenei e le o toe mamao ae mae’a ona faasalalau lea o tauofoga mo le fausia o le maketi fou i Savalalo, ma ua faailoa e le faalapotopotoga o eleele a Samoa o le masina fou o Iuni e tatau ona faamautu ai vaega uma.
O loo fuafua e 12 masina le umi o le a fausia ai le maketi fou.
O le taitaifono o le Komiti Faatonu o le faalapotopotoga o eleele a Samoa le afioga Matafeo George Latu ma le pule o le konekarate ua manumalo lana ofo e pulea ai le galuega le susuga Leiataua Tom Tinai na sainia pepa e faamautu ai le tuuina o lea tautua i le konekarate o le Tinai, Gordon & Associates Ltd ina ua mae’a ona ioeina e le Kapeneta.
O ata o le galuega fou ua molimauina ai a oo ina mae’a, o le a avea ma se tasi o vaaiga matagofie o fausaga fou o maota tetele faaonaponei i le taulaga o Apia.
