Ua sainia i Samoa i le Aso Lua o le vaiaso nei le maliega a le Malo ma le Faletupe o Atina’e o Asia, ua faamatuu mai ai se foai poo se grant e fitu tesimale lima miliona tala, e fesoasoani i le toe faaleleia o auaunaga tau pisinisi tuma’oti na feagai ma faaletonu ona o aafiaga mai le faamai Koviti-19.

O le tamaitai Minisita o Tupe le afioga Mulipola Ale Molioo ma le sui o le faletupe o atina’e o Asia i le Pasefika le susuga Aaron Batten na o la sainia le maliega mo le faaaogaina o lea foai tupe tele mo Samoa. 

Faaalia e le tamaitai minisita le agaga faafetai i le pulega o lea faletupe faavaomalo ona o le fesoasoani o le a mafai ona faaopoopo ai le lagolago atu i le faaleleia o pisinisi tuma’oti ina ia mafai ona togafiti nisi o aafiaga ia latou auaunaga ua afaina ona o puipuiga o le atunuu mai le faamai.

Ua faailoa foi e le sui o le faletupe, o le foai tupe ua faamatuu mai na faamautu i le aso 16 o le masina nei o Novema i le naunautaiga e faaleleia tulaga tau tulafono faatonutonu e toe faaleleia le siosiomaga o pisinisi tumaoti i Samoa.

O le itu i le pulea lelei o tupe, ma le siitia o pulega o pisinisi o le fatu lea o le fesoasoani a le faletupe o atiina ae o Asia e pei ona faailoa i se pepa o faamatalaga mai le faletupe.

O le sini autu foi o fuafuaga alualu mamao a lea faletupe tau atiina ae o le fesoasoani e tafiesea le mativa ma le le tagolima i atunuu asia ma le Pasefika.