O le teena ai o le talosaga a Malele Atofu Paulo ma Lema’i Faioso Sione e taofi le su’esu’eina o o la moliaga o le taupulepule e tagatavale lē sa avea ma Palemia le susuga Tuilaepa Lupesoliai Sailele Malielegaoi, ua toe faatulaga ai e le faamasinoga le aso 27 o Fepuari o le tausaga fou 2023, e valaau ai molimau a leoleo. O loo tumau pea ona teena ei la’ua le moliaga.
Na toe valaau le mataupu lenei i le Aso Gafua mo le faatulagaina o se aso e su’esu’eina ai e le faamasinoga sili lea moliaga, sa ioeina e Taualai Leiloa o loo tuli nei lona faasalaga i le falepuipui.
O le isi o loo molia foi i le taupulepule e tagatavale lē sa avea ma palemia, o Talalelei Pauga, lea o loo nofo taofia i le vaaiga a leoleo i Ausetalia, o loo tālia pea se taimi e aumai faapagota ai i Samoa e tali i le moliaga. Ua mae’a tuuina atu le talosaga a le Loia Sili a le Malo o Samoa i le Malo o Ausetalia e aumai faapagota lea tagata e su’esu’eina e le faamasinoga i Samoa lona moliaga.
