A’o feagai le malo o Samoa ma galuega o le tau fonofono o fa’aletonu o loo a’afia ai le auaunaga fa’asoifua mālōlōina, o se tala fiafia mo ia galuega le fesoasoani a le malo o Iapani e silia i le valu miliona tālā, o le a fa’aleleia ai lea tautua mana’omia e o tatou tagata.

O le Aso Lua o lenei vaiaso na sainia ai e le palemia susuga, Laaulialemalietoa Leuatea Polataivao Fosi Schmidt ma le Amapasa o Iapani lea lavea’i o le a aumai ai e lea malo mea faigaluega mo auaunaga tau soifua mālōlōina i le vaega e faia ai ta’otoga, nofoaga mo su’esu’ega o gasegase, ma le vaega o tinā ma’itaga.

O le maota gasegase o Tupua Tamasese Meaole i Motootua o le a tuusa’o iai lea fesoasoani ona o loo avea ma nofoaga autu o sulufa’iga mo gasegase o loo a’afia ai o tatou tagata. Fa’aalia e le ofisa o lea malo i lo tatou atunu’u o lana fesoasoani ua faamautu atili ai lana polokalame mo le auaunaga fa’asoifua mālōlōina i Samoa ia si’itia e pei ona sa faailoa i le tausaga e 2024 i le fono fa’aletausaga a le ta’ita’i o le malo o Iapani ma ta’ita’i o le pasefika e aofia ai ma Samoa.

O se tasi o fa’aopoopoga i le fuafuaga a lea malo o nisi o ana fesoasoani ua fa’ailoa lautele mai, e pei o le ta’avale mo galuega i le falema’i fa’amamā toto. O lea ta’avale e mafai ona fealua’i atu i nu’u ma afio’aga mo le siakiina o fatuga’o ma ua faatotogaina i masini ma mea faigaluega mo le faatinoina o lea auaunaga tau soifua mālōlōina.

O se tasi foi o foa’i mai lea malo ua taua’ao ai e le fa’alapotopotoga o vaa a Samoa ose auaunaga tuma’oti a le malo se vaa la’ititi e fa’aaoga mo galuega e fa’aleleia ai va’a la’u uta ma pasese o loo faagaioia ai le tautua a le faalapotopotoga o vaa a Samoa.

O le tasi o foai lava mo lea auaunaga tuma’oti a lo tatou malo o se loli e fa’aaoga lava i galuega toe fa’aleleia o va’a la’u uta ma pasese o loo tautuaina malaga i le va o Upolu ma Savai’i faapea i le va o Apia ma Pagopago.