Ua faamautu e le tamaitai Palemia o Niu Sila ia Jacinda Ardern, le fesoasoani a lona Malo e pine ai le 60 tausaga o le feagaiga faauo, o le toe fausia o le maketi i Savalalo, ma fesoasoani i atiina a’e e tali atu ai i suiga tetele o le tau.
A o iai le tamaitai Palemia i lo tatou atunuu i le amataga o lenei vaiaso sa ia faailoa ai le 12 miliona tupe Niu Sila o le a toe fausia ai le maketi i Savalalo, o se nofoaga e tele ona talafaasolopito mai le taimi o pulega faakolone a Niu Sila e oo mai ina tuto’atasi Samoa.
O le tasi lea o fuafuaga a le faigamalo ua iai nei ina ua tulai mai, o le toe fausia o lea maketi ma taofia ai le fuafuaga a le faigamalo sa iai, o le siitia o le maketi i se vaega o fanua o le Malo i Sogi. Ua faaalia e se molimau faatuatuaina ua mae’a ona tusia le ata o le maketi, ma ua faatali nei i le faasalalau o tauofoga mo se konekarate fau fale na te faatino le galuega.
O le galuega lea o le a lē gata ina faatupe e Niu Sila i lana fesoasoani ua faailoa lautele, ae o le a iai foi ma le sao tau tupe o le Malo o Samoa. O le tausaga e 2016 na faatamaia ai le maketi i Savalalo i le malaia poo le afi, o le mafuaaga lena o le tutū ai na o pou sima ma le fola sima, ae sa faaaogā fale’ie e ofaga iai le aufaipisinisi laiti ma fale’aiga. O le taimi nei ua lē o toe faaaogāina mo ia pisinisi ae ua na o faleoloa laiti o loo iai.
